Penalltia e Hulian Alvarez në derbin e Ligës së Kampioneve mes Atletikos dhe Realit është kthyer gjerësisht në një temë diskutimi pasi goli i tij u anulua për prekje të dyfishtë të topit nga lojtari.
Ai rrëshqiti në momentin e gjuajtjes së penalltisë, por shënoi. Megjithatë, gjyqtari Marciniak priti VAR-in dhe më pas e quajti golin e pavlefshëm, pasi Alvarez kishte bërë dy prekje, që nuk lejohen në gjuajtjen e penalltive. Kjo bëri që të hapej një debat i gjerë në rrjetet sociale me teori nga më të ndryshmet, teksa shumëkush mendon se ky ishte momenti që ndryshoi plotësisht fatin e gjuajtjeve të penalltive në favor të Realit.
Sot, UEFA është detyruar të dalë me një komunikate, të shoqëruar me videon e cila shpjegon prekjen e dyfishtë të Alvarez në momentin e goditjes.
“Edhe pse ishte minimale, lojtari kishte kontakt me topin me këmbën mbështetëse para se ta gjuante, siç tregohet në videon bashkëngjitur. Sipas rregullave aktuale, VAR-i u desh të lajmëronte gjyqtarin për të sinjalizuar që goli duhej të anulohej.
UEFA do të nisë bisedime me FIFA-n dhe IFAB-in për të vendosur nëse rregulli duhet rishikuar në rastet kur prekja e dyfishtë të jetë qartësisht e pavullnetshme”, shkruhej në njoftimin e UEFA-s për këtë moment aq të diskutuar.
SHIH VIDEON
PANORAMASPORT.AL
