Çelsi ka qenë “mbreti” i merkatos në futbollin europian gjatë vitit të fundit, duke shpenzuar rreth 1 miliard euro për futbollistët e rinj. Por skuadra e cila tashmë drejtohet nga Mauricio Poçetino, vazhdon të vuajë në fushën e lojës në Premier Ligë.
Pas barazimit ndaj Liverpulit në javën e parë, sot ka ardhur edhe humbja e parë në kampionat, në fushën e Uest Hemit, ku ka kapitulluar me shifrat 3-1. Protagonisti i ndeshjes ishte Uard-Prous, afrimi më i rëndësishëm në merkato për vendasit, i cili në minutën e 7 gjeti Aguerd në zonë, për golin e avantazhit (SHIH VIDEON).
Çelsi u përgjigj me Çukuemeka në minutën e 28 (SHIH VIDEON) ndërsa Enzo Fernandez humbi penallti në minutën e 43-të të sfidës.
Antonio i dha avantazhin vendasve në minutën e 53-të, pas një tjetër asisti të Uard-Prous (SHIH VIDEON), teksa Aguerd la ekipin e tij me 10 lojtarë në minutën e 67.
Por Uest Hemi rezistoi edhe në inferioritet numerik e për më tepër, në minutat shtesë të ndeshjes, vulosi fitoren 3-1 me golin me penallti të Lukas Pakueta (SHIH VIDEON). Padyshim një mesazh mbështetjeje për brazilianin i cili është nën hetim për përfshirjen në baste sportive.
PANORAMASPORT.AL
