Zvicra ka hedhur një tjetër hap gjigant drejt kualifikimit në finalet e Kupës së Botës 2026, pasi mposhti bindshëm Suedinë me rezultatin 4-1 në Gjenevë. Ky ishte suksesi i pestë radhazi për helvetët në Grupin B dhe një tjetër dëshmi e forcës së tyre në këtë fushatë.
Protagonist i fillimit të ndeshjes ishte Breel Embolo, i cili shënoi që në minutën e 12-të pas një aksioni të ndërtuar bukur nga Dan Ndoye. Megjithatë, Suedia reagoi papritur dhe arriti të barazojë në minutën e 33-të, duke i dhënë Zvicrës golin e parë të pësuar në këto kualifikuese. Anthony Elanga shpërtheu nga e majta dhe asistoi Benjamin Nygren, i cili e dërgoi topin në rrjetë me një goditje të saktë.
Në fillim të pjesës së dytë, një gabim fatal në mbrojtjen suedeze i hapi rrugë Embolosë drejt portës, me portierin Johansson që ndërhyri në mënyrë të gabuar. Pas verifikimit në VAR, u akordua penallti, të cilën Granit Xhaka e shndërroi në gol për 2-1. Ky moment u kthye në pikë kthese, pasi Zvicra rifitoi plotësisht kontrollin e lojës.
Në minutën e 75-të, Dan Ndoye vulosi ndeshjen me një goditje precize në këndin e largët, ndërsa në fund Johan Manzambi shtoi edhe golin e katërt.
Me këtë fitore, Zvicra mbetet lidere e grupit dhe i duhet vetëm një pikë në finalen ndaj Kosovës për të siguruar matematikisht pjesëmarrjen në Botëror. Ndërkohë, Suedia rrezikon seriozisht të mbyllë një fushatë kualifikuesesh pa asnjë fitore, një moment historikisht i errët për skandinavët.
Në Pire, Greqia befasoi Skocinë duke e mposhtur 3-2, një rezultat që i ndal skocezët të marrin kryesimin e Grupit C. Situata komplikohet edhe më shumë nga fakti që Danimarka nuk shkoi më shumë se një barazim 2-2 kundër Bjellorusisë, duke e lënë garën të hapur deri në fund.
Emocione të mëdha u panë edhe në Grupin H, ku Bosnja dhe Hercegovina përmbysi Rumaninë me rezultatin 3-1. Falë këtij suksesi, ballkanasit e çojnë betejën për kualifikim në një finale të vërtetë ndaj Austrisë në ndeshjen e fundit. Austriakëve u duhet vetëm një barazim për të siguruar vendin në Botëror, ndërsa Bosnja kërkon fitoren për të bërë realitet ëndrrën.
