Nënkampionia e Superligës së Kosovës në futboll, Drita do të përballet me ekipin e madh çek, Viktoria Plzen në kualifikimet për Ligën e Konferencës.
Viktoria Plzen dhe Drita do të përballen në kuadër të raundit të dytë kualifikues në Ligën e Konferencës, shkruan lajmi.net.
Klubi çek me përvojë në garat e mëdha të UEFA-s i ka bërë një përshkrim klubit nga Gjilani me anë të një publikimi në uebfaqen zyrtare.
Viktoria Plzen ka njoftuar tifozët e saj me disa statistika për klubin e Dritës, duke theksuar edhe pjesëmarrjen e saj në garat evropiane ndër vite.
Gjithashtu, ata kanë bërë thirrje për mbështetje nga tifozët e tyre, duke iu premtuar biletën falas për këtë ndeshje një pjese të tifozëve.
“Ne do të kemi nevojë për mbështetjen tuaj, viktorianë! Besojmë se do të krijoni një mbështetje të madhe për ekipin” – thuhet ndër tjerash në publikimin e Viktoria Plzen.
Ndeshja e parë në mes Viktoria Plzenit dhe Dritës luhet më 27 korrik në Doosan Arena, ndërkohë ajo e kthimit një javë më vonë në stadiumin “Fadil Vokrri” në Prishtinë./Lajmi.net/
