Monday, 16. November 2026
Sport

Vinicius zbulon arsyen e formës së dobët: Pushova shumë dhe u stërvita pak

GS 16/11/2026 2 Min. Lesezeit

Ylli brazilian Vinicius Junior ka pranuar se pushimet luksoze gjatë verës dhe përgatitja jo e zakonshme fizike kanë ndikuar në startin e dobët të sezonit me Real Madridin.

Në një intervistë të publikuar nga Daily Mail, sulmuesi 26-vjeçar ka treguar se eliminimi i hershëm i Brazilit nga Kupa e Botës e kishte rënduar emocionalisht, ndaj kishte vendosur të shfrytëzonte pushimet për të kaluar më shumë kohë me familjen dhe për të pushuar.

“Përfundova duke u stërvitur më pak se në vitet e kaluara. Kjo mund të ketë ndikuar në fillimin tim të sezonit”, ka pranuar Vinicius.

Braziliani ka kaluar një pjesë të verës në Brazil, Xhamajkë, Itali dhe Dubai, ndërsa në rrjetet sociale kishte publikuar fotografi nga pushimet në jahte dhe udhëtimet me aeroplan privat.

Megjithatë, pushimet nuk ishin faktori i vetëm.

Vinicius ka pranuar se pasiguria rreth kontratës së tij dhe interesimi i klubeve të tjera, përfshirë Arsenalin, e kishin ngarkuar edhe në aspektin psikologjik.

“Me kaq shumë klube të interesuara gjatë verës, u ndjeva vërtet i mbingarkuar, ashtu si edhe nga situata te Real Madridi. Por sezoni është shumë i gjatë”, ka deklaruar braziliani.

Sulmuesi ka përmendur edhe vështirësinë për të ruajtur vazhdimisht statistika të larta, duke marrë si shembull dy prej futbollistëve më të mëdhenj të historisë.

“Ruajtja e një niveli kaq të lartë për një kohë kaq të gjatë është gjithmonë shumë e vështirë. Besoj se vetëm Cristiano Ronaldo dhe Messi kanë arritur ta bëjnë këtë për kaq shumë vite, duke regjistruar shifra të njëjta”, ka thënë ai.

Pavarësisht kritikave, Vinicius është shprehur i bindur se mund ta rikthejë formën më të mirë, duke kujtuar se edhe sezonin e kaluar kishte pasur një fillim të ngadaltë, por më pas e kishte përfunduar me mbi 20 gola.

Ndërkohë, një zhvillim i rëndësishëm në të ardhmen e tij është se braziliani ka nënshkruar kontratë të re me Real Madridin deri në vitin 2032, në gusht të këtij viti.

Pra, pavarësisht interesimit të raportuar nga Arsenali, ai mbetet i lidhur me klubin madrilen për disa sezone të tjera.

 

Teilen: