Manchester City mbylli në mënyrën më të mirë këtë vit kalendarik, duke fituar edhe Botërorin e Klubeve, pasi mposhti në finale Fluminensen me rezultatin e pastër 4-0.
Pas titullit kampion në Angli, triumfit në Champions League, fitimit të Kupës FA dhe Superkupës së Europës, “Qytetarët” fituan për herë të parë në histori edhe Kupën e Botës për klube.
“Ka qenë një vit i pabesueshëm. Mbyllëm një kapitull me suksesin e sotëm. Fituam gjithçka që mund të fitonim. Tani duhet të provojmë të përsërisim të njëjtin sukses”, ka thënë pas fitimit të Botërorit të klubeve trajneri spanjoll i anglezëve.
Ky ishte trofeu i 37-të që Guardiola ka fituar në karrierën e tij si trajner, që nga viti 2008 kur nisi eksperiencën e tij të parë në krye të Barcelonës dhe suksesi i katërt në Botërorin e klubeve, duke kaluar edhe Ancelottin.
Në krye të Manchester City, Guardiola ka fituar 5 kampionate angleze, 4 Kupa Lige, 2 Kupa FA, 2 Superkupa të Anglisë, 1 Ligë Kampionëve, 1 Superkupë Evropë dhe 1 Botëror Klubesh.
Në drejtimin e Bayern Munich spanjolli ka fituar 3 kampionate gjermane, 2 Kupa të Gjermanisë, 1 Superkupë Evropë dhe 1 Botëror Klubesh.
Ndërsa në krye të Barcelonës 52-vjeçari ka fituar 3 kampionate spanjolle, 2 Kupa Mbreti, 3 Superkupa të Spanjës, 2 Superkupa të Evropës, 2 Liga Kampionëve dhe 2 Botërorë klubesh.
