Janë luajtur këtë të mërkurë ndeshjet e kthimit çerekfinale të Kupës, të cilat erdhën për shikuesit në ekranin e RTSH, duke përcaktuar katër skuadrat gjysmëfinaliste që janë Vllaznia, Elbasani, Dinamo dhe Egnatia.
Vllaznia, pas fitores 1-0 në ndeshjen e parë në transfetë me Bylisin, arriti një tjetër sukses, 2-1 në “Loro Boriçi”. Golat për kuqeblutë u shënuan nga Balaj dhe Pusi. Për ballshiotët shënoi Dos Santos.
Elbasani, pas 120 minutash lojë në “Arena e Demave”, arriti një fitore 3-1(rezultati i përgjithshëm 3-2) me golat e Lajthisë(dy gola) dhe Gomes. Për të kuqtë goli i vetëm u shënua nga Contreras. Kujtojmë që Partizani vinte në këtë sfidë me fitoren 1-0 të arritur në “Elbasan Arena”.
Nuk ka fitues në “Egnatia Arena” mes Egnatias dhe Teutës ku gjithçka u mbyll 0-0, por falë fitores 2-1 në ndeshjen e parë rogozhinasit vazhdojnë më tej.
Dinamo ka arritur një fitore 2-0 në “Air Albania” përballë Tiranës me golat e Nezirit dhe Guindos, i njëjti rezultat si në ndeshjen e parë, duke siguriar kështu kualifikimin me rezultatin e përgjithshëm 4-0.
Për të përcaktuar përballjet e gjysmëfinaleve të Kupës së Shqipërisë do të hidhet short i lirë në ambientet e “Shtëpisë së Futbollit”, i cili do të organizohet nga Departamenti i Garave në FSHF.
