Federata e Volejbollit të Kosovës ka suspenduar gjashtë lojtarë që ishin të përfshirë në incidentin e ndodhur gjatë ndeshjes së Kupës së Kosovës ndërmjet Pejës dhe Ferizaj ku pati përleshje ndërmjet lojtarëve dhe një grupi të tifozëve.
Në njoftimin e lëshuar nga FVK, thuhet se lojtarët Arlind Kabashi, Leotrim Mujaj, Agron Nikqi, Dardan Husaj, Kaltrim Berisha, dhe Gazmend Husaj janë suspenduar nga të gjitha aktivitetet e organizuara nga FVK, përfshirë ato ndërkombëtare
Federata e Volejbollit të Kosovës (FVK) shpreh shqetësim për incidentin e ndodhur gjatë ndeshjes së Kupës së FVK-së mes ekipeve Peja dhe Ferizaj. FVK ka nisur menjëherë procedurat për trajtimin e kësaj çështjeje dhe po bashkëpunon ngushtë me organet kompetente për një zgjidhje të drejtë dhe transparente.
Në përputhje me rregulloret, Komesari i Garave ka vendosur që gjashtë lojtarët e përfshirë në incident:
• Arlind Kabashi,
• Leotrim Mujaj,
• Agron Nikqi,
• Dardan Husaj,
• Kaltrim Berisha, dhe
• Gazmend Husaj,
të suspendohen nga të gjitha aktivitetet e organizuara nga FVK, përfshirë ato ndërkombëtare në bashkëpunim me federatat partnere. Ky pezullim mbetet në fuqi deri në vendimin e Komisionit Disiplinor”, thuhet në njoftimin e FVK-së.
