Wolverhampton ka njoftuar zyrtarisht emërimin e Rob Edwards si trajner i ri i klubit. 42-vjeçari, i cili la Middlesbrough për t’u rikthyer te Wolves, ku kishte kaluar si lojtar, ka firmosur një kontratë trevjeçare e gjysmë.
Sipas mediave britanike, klubi i mëparshëm i Edwards do të marrë një kompensim prej rreth 3.4 milionë eurosh, ndërsa Harry Watling, gjithashtu nga Middlesbrough, do të shërbejë si ndihmës i tij.
Si lojtar, Edwards ka zhvilluar 111 ndeshje për Wolves si qendërmbrojtës nga viti 2004 deri më 2008. Në 2016, ai ishte trajner i përkohshëm i ekipit pas dorëheqjes së Walter Zenga-s.
Vítor Pereira u largua nga drejtimi i Wolves më 2 nëntor, pas një serie prej dhjetë ndeshjesh pa fitore në Premier League, duke lënë ekipin në vendin e fundit të tabelës. Sfida e ardhshme për Edwards nuk është e lehtë, me ndeshje kundër Crystal Palace, Aston Villa, Nottingham Forest dhe Manchester United.
Edwards kishte drejtimin e Middlesbrough vetëm për 15 ndeshje zyrtare, ndërsa në 2023 kishte drejtuar Luton në Premier League, duke sjellë përvojë të vlefshme në nivelin më të lartë të futbollit anglez.
Ky emërim mund të sjellë stabilitet dhe rezultatet e nevojshme për Wolves në këtë sezon të vështirë.
Welcome back, Rob Edwards 🐺
🗞️ https://t.co/wev3xlkSk0 pic.twitter.com/ayefCHi64R
— Wolves (@Wolves) November 12, 2025
