Barcelona nuk ka arritur më shumë se një barazim 1-1 nga udhëtimi në Mestalla përballë Valencias.
Kjo ishte ndeshja e dytë radhazi pa fitore në La Liga për katalunasit pas humbjes javën e kaluar në shtëpi nga Girona.
Trajneri i Barcelonës, Xavi Hernandez ka folur pas ndeshjes duke thënë se për ta ishte si një finale dhe një pikë është e pamjaftueshme.
“E njëjta gjë si javën e kaluar i ndodh sërish efikasitetit tonë. Ndaj Valencias kemi humbur dy pikë. Një pikë ishte e pamjaftueshme, ishte një finale”, deklaroi Xavi.
“Jam i qetë, me të njëjtin entuziazëm si gjithmonë. Jemi në rrugën e duhur. Kishte ndjenja shumë të mira në lojë, do të përmirësohemi”, tha ndër të tjera numri një i stafit të Barcelonës.
Barcelona tani e sheh vetën gjashtë pikë larg liderit Gironës pas 17 xhirove, edhe pse kryesuesit aktual të La Ligas kanë një ndeshje më pak të zhvilluar.
Në xhiron e ardhshme që zhvillohet në mesjavë, katalunasit do të përballen me Almerian ku synojnë të rikthehen te fitoret.
