Përzgjedhësi i Zvicrës, Murat Yakin ka publikuar të enjten listën e futbollistëve të ftuar për ndeshjet miqësore të këtij muaji.
Yakin në listën e tij ka përfshirë 26 futbollistë, ndërsa në mesin e tyre janë edhe tre shqiptarë.
Bëhet fjalë për kapitenin Granit Xhaka, zëvendës-kapitenin Xherdan Shaqiri dhe Uran Bislimin, i cili është pjesë e skuadrës së Lluganos.
Bislimi vitin e shkuar ka debutuar me ekipin A të Zvicrës dhe ka dy paraqitje deri më tani. Zvicra të hënën do ta nis grumbullimin ndërsa këtë muaj do t’i luajë dy ndeshje miqësore që janë të vlefshme si parapërgatitje për “Euro 2024”.
Më 23 mars, Zvicra do të përballet me Danimarkën në Kopenhagë, ndërsa tri ditë më vonë do të luaj në Dublin kundër Irlandës.
Në Evropianin e këtij viti, Zvicra është pjesë e Grupit A së bashku me Gjermaninë, Skocinë dhe Hungarinë.
