Egnatia është kualifikuar në finalen e Kupës së Shqipërisë. Edhe pasi u mposht 0-1 nga Partizani në ndeshjen e parë, fitoi të dytën me rezultatin 0-2. Pas këtij dueli ka folur mbrojtësi Arbenit Xhemajli, i cili u shpall “Lojtari i Ndeshjes”.
“Nuk është se i kam munguar unë Egnatias, gjithmonë ekipi ka qenë kolektiv. Nuk kemi pasur kurrë në ekip individualista, mungoj unë, Aleksi, Fangaj, gjithëkush zëvendësohet. Jam kthyer nga dëmtimi në kohën e duhur, ishte dhuratë e mirë për mua pasi kam ditëlindjen.
E kemi përgatitur gjatë gjithës javës që Partizani të luante në mbrojtje, që do priste për kundërsulm. Kemi krijuar shumë raste me krosime, patëm edhe fatin që në pjesën e parë ata nuk shënuan golin. Fati sot ishte në anën tonë.
Ndoshta kam pasur më shumë fat. Në sezonin e parë kam pasur raste, por nuk kam shënuar. Këtë vit ndoshta ishte ego personale e imja që dua t’i ndihmoj edhe unë ekipit. Me golin e sotëm i kam dhënë frymë ekipin që sot mund të kualifikoheshim.
Dinamo në finale? Kemi kohë për t’u përgatitur për kundërshtarin e finales. Egnatia e ka fituar dy herë Kupën dhe jemi shumë të lumtur që jemi në finale. Do analizojmë kundërshtarin dhe shpresojmë që ta bëjmë 3 herë radhazi”, tha Xhemajli.
