Ylli 19-vjeçar motivon shokët e skuadrës pas dy asistimeve dhe një aksioni spektakolar, të denjë për “Topin e Artë”: “Ne jemi më të mirët nga të gjithë, është absolutisht e mundur t’i fitojmë të gjithë trofetë”.
Lamine Yamal vazhdon të dhurojë spektakël. Fenomeni i Barcelonës nuk resht së mahnituri, edhe pse cilësitë e tij nuk përbëjnë më surprizë për askënd. Ai është në gjendje të shpikë aksione nga hiçi, si ai që i dha mundësinë të regjistronte asistimin e dytë në ndeshjen e djeshme.
Fillimisht, provoi një lëvizje të ngjashme me “rabona”, por në vend që të godiste topin, thjesht e zhvendosi atë. Më pas, me një kombinim të këmbës së majtë dhe asaj të djathtë, la pas kundërshtarin që e markonte dhe në fund dha pasimin me pjesën e jashtme të këmbës së majtë. Një kryevepër për sytë.
Pas ndeshjes, në një intervistë për “CBS Sports”, Lamine Yamal foli edhe për objektivat që dëshiron të arrijë me Barcelonën: “Për mua, ne jemi skuadra më e mirë në botë, ndaj do të thoja se fitimi i tripletës është absolutisht i mundur”.
I njohur prej kohësh për guximin dhe vetëbesimin e tij, krahu i djathtë i sulmit beson më shumë se kurrë tek aftësitë e veta, por sidomos te forca e skuadrës katalanase. Në fund të fundit, në moshën vetëm 19-vjeçare, ai ka fituar Kampionatin Europian dhe Kupën e Botës, ndaj fjalët e tij meritojnë vëmendje.
Yamal iu përgjigj në mënyrë provokuese Mario Lemina-s në Instagram. Para ndeshjes, ky i fundit kishte pyetur me ironi kamerat se kush ishte Yamal. Përgjigjja e talentit të Barcelonës ishte e shkurtër dhe thumbuese: “Po tani, më njeh?”
