Ish-sulmuesi i Interit, Ivan Zamorano foli sërish për fanellën historike 1+8 që mbajti veshur te Interi nga viti 1998 deri në vitin 2000: “E gjitha erdhi sepse Ronaldo, i cili luajti gjithë jetën me 9-shin, kërkoi atë numër. Thashë se nuk e kam problem, nëse më duhet t’ia lë numrin nëntë Ronaldos, më të mirit në botë, ia lë atij. Ajo që më ndodhi është se ne si futbollistë duhet të rinovojmë vazhdimisht veten. Kështu që e pyeta presidentin Massimo Moratti nëse mund të shtoja numra”.
“Ai m’u përgjigj: ‘Nuk ka problem, mund të luash me 27 ose 18’. Unë i thashë: ‘Jo, dua të shtoj një shenjë plus’. Ai u përgjigj se nuk mund të bëhej. Por unë iu përgjigja: “Nëse jeni president, flisni me presidentin e Federatës. Ai e bëri dhe mua më dhanë leje. Ishte një nga fanellat më të shitura në historinë e futbollit italian”, tha ai në një intervistë për Betsson Sport.
