Klubi i Beshiktashit është padyshim një nga emrat e mëdhenj të futbollit turk dhe mbërritja e kësaj skuadre në Tiranë për sfidën ndaj bardhebluve të Shehit, është trajtuar si një eveniment i veçantë edhe nga pala turke.
Kjo shihej edhe nga fakti që klubi i qytetit të Stambollit, është pritur në aeroportin “Nënë Tereza” nga përfaqësuesit më të lartë diplomatikë të shtetit turk në vendin tonë. Ambasadori turk Tayyar Kağan Atay, ishte ai i cili priti skuadrën në Rinas, duke i uruar mirëseardhjen në vendin tonë.
Njëkohësisht, shumë përfaqësues të bizneseve dhe organizatave turke që veprojnë në Shqipëri, ishin të pranishëm në pritjen në Rinas, duke e trajtuar këtë udhëtim të klubit të njohur si një eveniment edhe për ta.
Pritet që gjatë ndeshjes së nesërme në “Air Albania”, në stadium të ketë të pranishëm një numër të konsiderueshëm shtetasish turq që jetojnë e punojnë në vendin tonë, kureshtarë për të parë nga afër skuadrën e drejtuar nga Senjol Gynesh.
PANORAMASPORT.AL
