Simone Inzagi dhe lidhja e tij e ngushtë me lojtarët e Lacios, të cilët i ka stërvitur për disa vite, nuk është sekret për asnjë. Pasi mori me vete në Milano Hoakin Korrean e më pas Françesko Açerbin, trajneri kërkoi me ngulm Sergej Milinkoviç-Saviçin, por nuk u ndal këtu.
Sipas asaj që ka zbuluar dje e përditshmja italiane “Corriere dello Sport”, Inzagi ka tentuar të sjellë në Milano as më pak e as më shumë se kapitenin e bardhekaltërve, Çiro Imobile.
47-vjeçari i telefonoi sulmuesit në verë për ta bindur t’u bashkohej zikaltërve pas lamtumirave të Lukakut dhe Xhekos, por lojtari zgjodhi Lacion, edhe pse ka një tjetër motiv pse përpjekjet nuk shkuan më tej.
Në çdo rast Klaudio Lotito nuk do ta linte të largohej Imobilen për një shumë më të ulët se 50 milionë euro dhe zikaltrit nuk mund ta përballonin një shifër të tillë.
Për më tepër drejtuesit e Interin e dinë mirë se negociatat me presidentin lacial nuk janë aspak të thjeshta dhe një ulje çmimi për kapitenin e tij do të ishte në kufijtë e së pamundurës.
PANORAMASPORT.AL
