Në stolin belg mund të ishte një tjetër trajner francez dhe jo Rudi Garcia, që u zyrtarizua sot si trajneri i ri i “djajve të kuq”.
Sipas mediave belge, Federata belge e Futbollit ka kontaktuar fillimisht me Zinedine Zidane, një trajner i cili ka qenë i lirë që nga maji 2021 pas përvojës së tij të dytë te Real Madrid, klub me të cilin si trajner fitoi dy kampionate spanjolle, dy Superkupa të Spanjës dhe mbi të gjitha tre Liga të Kampionëve, dy Superkupa Evropiane dhe dy Kupa të Botës për Klube.
Zidane do ta kishte refuzuar propozimin e Djajve të Kuq, pasi ai pret që aventura e ish-shokut të tij të skuadrës Didier Deschamps si trajner i Francës të përfundojë pas Kupës së Botës 2026, në mënyrë që të mund ta pasonte atë dhe kështu të drejtonte kombëtaren e vendit të tij.
