Silvio Berluskoni dhe Zlatan Ibrahimoviç. Dy largimet nga Milani në dy mënyra të ndryshme. Nëse ishpresidenti iu dorëzua sëmundjes, suedezi e mbylli me futbollin e luajtur prej moshës, por nuk është e thënë që rruga e tij me atë të kuqezinjve të mos kryqëzohen sërish në të ardhmen. Këto dy personazhe i ka komentuar Olivie Zhiru në një intervistë për “Eurosport”.
Duke folur për Beluskonin, bomberi francez ka thënë: “Dukej që ishte një person që e respektonin të gjithë. Më vjen keq që u nda nga jeta, por nuk do ta harrojmë kurrë për gjithçka bëri për Milanin, duke e ngritur në majat e futbollit në Europë. Berluskoni ishte i jashtëzakonshëm dhe mitik e mendoj se do të vazhdojë të kujtohet me nderim dhe respekt të madh nga të gjithë”.
Sigurisht, Zhiru nuk mund të mos fliste edhe për dy sezonet e luajtura krah Zlatan Ibrahimoviçit. Dy veteranë, që secili në mënyrën e vet ndihmuan në titullin e vitit të kaluar, duke shpërndarë këshilla të vyera, e duke i dhënë qetësi shokëve përpara momenteve delikate. “Kur mbërrita te Milani nuk i thashë menjëherë, por isha një tifoz i tij. Ka qenë gjithmonë një nga lojtarët e mi të preferuar. Ai është shembull për këdo, ka bërë shumë për futbollin dhe për Milanin.
Ne ishim shumë të emocionuar kur e pamë të jepte lajmin se do të tërhiqej. Pas ndeshjes nuk e prisja fundin e karrierës së tij, por ishte një homazh i bukur dhe ishte një privilegj dhe kënaqësi të luaja me të”, përfundoi 36-vjeçari deklaratën e tij për “Eurosport”.
Teksa Ibrahimoviçi e mbylli sezonin e fundit me vetëm katër prezenca dhe një gol (me penallti ndaj Udinezes), Zhiru mbajti i vetëm të gjithë peshën e sulmit të Milanit, ku lojtarë si Rebiç apo Origi nuk dhanë asgjë.
Sa i përket francezit, ai zbriti në fushë 47 herë në të gjitha kompeticionet, duke shënuar 18 gola (13 në Serinë A dhe 5 në Ligën e Kampioneve). Ndërkohë, ishte efektiv edhe për sa i përket asisteve duke dhënë 5 në kampionat e dy në Europë.
Përgatiti: REINOLD BAKALLI – PANORAMASPORT.AL
