Milani më në fund ka siguruar firmën e qendërmbrojtësi serb Strahinja Pavloviç. Kuqezinjtë ishin prej kohësh në ndjekje të lojtarit të Salcburgut dhe akordi mes palëve më në fund është arritur gjatë ditës së sotme, me zyrtarizmin që erdhi nëpërmjet një njoftimi të vetë klubit italian.
“Milani është i lumtur të komunikojë se ka blerë të drejtat e futbollistit Strahinja Pavloviç të Red Bull Salcburg. Mbrojtësi serb ka firmosur një kontratë me klubin kuqezi deri më 30 qershor 2028, me opsion për një tjetër vit”, shkruhej në komunikatën e kuqezinjve.
Milani kishte monitoruar prej muajsh futbollistin, i cili është bërë pjesë e rëndësishme edhe e përfaqësueses së vendit të tij, me të cilën ka luajtur 38 ndeshje duke shënuar 4 gola. Klubi bëri të ditur se ai do të mbante fanellën me numrin 31 në sezonin e tij të parë te Milani.
PANORAMASPORT.AL
