Komisioni i Garave i Federatës së Futbollit të Kosovës ka marrë masa disiplinore ndaj zyrtarit të FC Liria, Edon Thaqi, pas një gabimi të ndodhur në protokollin zyrtar të ndeshjes ndërmjet Trepçës ’89 dhe Lirisë.
Sipas njoftimit zyrtar, Thaqi gjatë evidentimit të lojtarëve në protokoll ka bërë një gabim teknik duke i ngatërruar numrat e fanellave të dy futbollistëve të Lirisë. Ky ndërrim ka shkaktuar huti më vonë gjatë ndeshjes, kur një prej lojtarëve mori ndëshkim me karton të verdhë, duke e vendosur gjyqtarin kryesor në një situatë të paqartë.
Ky lëshim është evidentuar në protokollin zyrtar të takimit Trepça ’89 – Liria dhe përbën shkelje të rregullave të përcaktuara nga FFK për mbarëvajtjen e ndeshjeve.
Komisioni i Garave ka theksuar rëndësinë e korrektësisë në administrimin e protokolleve zyrtare, pasi gabime të tilla mund të ndikojnë në rrjedhën e ndeshjes dhe të çojnë në vendime të gabuara nga gjyqtarët.
Masat disiplinore ndaj Thaqit pritet të publikohen në vendimet zyrtare të radhës të Komisionit të Garave.
