Juventusi është i detyruar që të marrë masat në merkaton e janarit, sidomos për të përforcuar repartin e mesfushës, pas dënimeve të Pol Pogbasë për doping dhe Nikolo Faxholit për bastvënie. Dhe mes shumë emrave që përmenden objektivi i ri dhe mesa duket i vënë në shinat e duhura duket Kalvin Filips i Mançester Sitit.
Lojtari i blerë me shumë bujë nga Lids, por që asnjëherë nuk gjeti hapësirë dhe besimin e Pep Guardiolës do të përfundojë në huazim në janar, siç pranoi të shtunën vetë tekniku dhe Juventusi duket pranë akordit me “Qytetarët” dhe vetë futbollistin. Madje, në janar për “Zonjën e Vjetër” pritet një muaj anglez, duke qenë se edhe zëvendësuesi i Aleks Sandros luan gjithashtu në Premier Ligë.
Bëhet fjalë për Lloid Kelin, 25- vjeçarin që aktivizohet në radhët e Bornmëthit. Këta të fundit janë të detyruar që ta shesin në dimër mbrojtësin e tyre, duke qenë se në verë i skadon kontrata dhe Bornmëth nuk ka ndërmend që ta humbë më parametër zero Kelin.
PANORAMASPORT.AL
