Sulmuesi Vedat Muriqi do t’i mungojë Kosovës në dy ndeshjet tjera kualifikuese për Kampionatin Evropian “Euro 2024”.
Lajmi është konfirmuar nga Federata e Futbollit e Kosovës me anë të njoftimit të publikuar në uebfaqen e tyre, shkruan lajmi.net.
Vedat Muriqi u lëndua në ndeshjen e fundit, kundër Izraelit, e zhvilluar të dielën e kaluar, në stadiumin “Fadil Vokrri” në Prishtinë.
Sulmuesi i Mallorcas u detyrua ta linte fushën pas lëndimit, ndërkaq teksa u largua nga fusha, iu nevojit edhe ndihma e stafit mjekësor.
“Përfaqësueses në grumbullim iu kanë bashkuar edhe Florent Hadërgjonaj dhe Mërgim Vojvoda, të cilët munguan në ndeshjen e parë, derisa në stërvitje ka munguar Vedat Muriqi, i cili është lënduar në pjesën e dytë kundër Izraelit dhe tashmë pas ekzaminimeve mjekësore është konstatuar se do t’i humbasë dy ndeshjet e fundit të kësaj fushate kualifikuese” – thuhet ndër tjerash në njoftimin e FFK-së.
Dardanët përballen me Zvicrën më 18 nëntor në Bazel, ndërkaq tri ditë më vonë luajnë në shtëpi kundër Bjellorusisë./Lajmi.net/
