Pas pushimit për shkak të ndeshjeve të ekipeve kombëtare, kalendari për Milani parashikon ndeshjen e “San Siro”-s me Fiorentinën, rival ndaj të cilit Pioli do të duhet të bëjë pa të Olivie Zhirunë e pezulluar dhe Rafael Leaon e dëmtuar.
Pa dyshen, sulmi kuqezi do të rimodelohet. Duke përjashtuar ndonjë dëmtim, siç ndodh shpesh së fundmi te “djalli”, titullarët e 25 nëntorit do të jenë Çukvueze e Pulisiç në krahët e Okaforit që do të duhet të bëjë pykën.
Herën e fundit që luajtën së bashku, në Kaljari, zvicerani shënoi dy herë. Një tjetër variant mund të jetë Joviçi në rolin e qendërsulmuesit me dy nga treshja e sipërpërmendur pas shpinës së tij.
Ndërkohë që në “Milanello” ka nisur puna me lojtarët që nuk kanë shkuar nëpër kombëtaret përkatëse, ideja më e re është ajo që prek Françesko Kamardën.
Ende nuk ka mbushur 16 vjeç, por sulmuesi i ekipit të të rinjve shënon me një rregullsi të frikshme dhe Pioli po mendon ta grumbullojë me ekipin e parë për dy ndeshjet e radhës ku mungesa e Zhirusë është e sigurt.
Në rast debutimi, me 15 vitet e 252 ditë mbi supe ai do të vendoste një rekord të ri te Milani për sa i përket lojtarit më të ri që ka uajtur një ndeshje zyrtare në Serinë A me fanellën kuqezi.
Duke parë golat e fundit, si ai me PSGnë në “Youth League”, Kamarda duket i aftë për të shpikur gola, por nuk duhet harruar diferenca e kampionatit ku militon me nivelin e lartë të Serisë A.
PANORAMASPORT.AL
