Mes Tomas Mylerit dhe Bayern Mynihut duket se ka një dashuri të përjetshme. Sulmuesi gjerman ka arritur një marrëveshje të re me kampionët e Gjermanisë, kontratë e cila do të jetë e vlefshme deri në verën e vitit 2025. Lajmi është publikuar fillimisht nga vetë klubi bavarez në llograinë zyrtare në rrjetet sociale.
Myler ka një jetë që luan me kampionët e Gjermanisë, pikërisht që nga viti 2000 me të rinjtë për të vazhduar më pas me skuadrën e parë. Ai numëron 32 trofe, 684 ndeshje, 237 gola të shënuar dhe 261 asiste në “Allianz Arena”.
“FC Bajern ka zgjatur kontratën e Tomas Myler me një sezon të mëtejshëm deri më 30 qershor 2025. Sulmuesi fillimisht iu bashkua klubit në moshën 10-vjeçare nga TSV Pahl, duke ardhur nga radhët e të rinjve dhe duke bërë debutimin e tij për ekipin e parë në 2008-ën”, thuhet në komunikatën e klubit.
Pas rinovimit, presidenti Herbert Hainer tha: “Tomas Myler i përket FC Bajern si Frauenkirche në Mynih. Ai ka lindur jashtë qytetit, është rritur në këtë klub dhe tashmë është një legjendë ndërsa luan ende. Shumë pak lojtarë e arrijnë këtë. Karriera e tij është e mbushur me rekorde në librat e historisë. Bajern është formuar nga shumë njerëz dhe nuk do të ketë më kurrë një lojtar si Tomas Myler”.
Ndërsa sulmuesi 34-vjeçar, pas rinovimit të kontratës u shpreh: “Jam i lumtur që rrugëtimi im me Bajernin vazhdon. Dua të luaj rolin tim, që të vazhdojmë të jemi të suksesshëm, si skuadër ashtu edhe si klub. Është e rëndësishme për mua të jem gur themeli dhe të ndihmoj ekipin që të ecë në drejtimin e duhur.
Dua të emocionoj tifozët tanë me gola, duke ndihmuar edhe me krijimin e golave, me dashurinë time për lojën dhe me pasionin tim për futbollin. Shpresoj që të fitojmë shumë tituj të tjerë”.
PANORAMASPORT.AL
