Një prej lojtarëve të Gjermanisë që bëri të sajën titullin Kampion Bote në vitin 2014, ka vendosur të tërhiqet nga futbolli i luajtur në moshën 31-vjeçare, duke i çuditur të gjithë. Erik Durm, nga të paktët lojtarë që nuk luajti në atë aktivitet me fanellën e Gjermanisë edhe pse ishte pjesë e grupit, ka varur këpucët në gozhdë duke u larguar nga Kaizerslautern.
Ka qenë vetë klubi i Bundesligës 2, me të cilin Durm ka pranuar se është tifoz, ai që ka bërë të ditur se kishte ndërprerë kontratën me mesfushorin pasi ky i fundit po mbyllte karrierën e tij. Vetë Durm më pas ka shpjeguar arsyet.
“Që nga vera e vitit të kaluar, më është dashur të vuaj vazhdimisht me dëmtime të vogla dhe probleme shëndetësore, ndaj nuk kam arritur të ndihmoj Kaizerslautern ashtu siç do të doja. Ndaj po i jap fund sot karrierës time, të cilën e shoh me shumë krenari për atë që kam arritur”,. shprehej 31-vjeçari.
Durm ishte një nga surprizat në grupin e “Panzerave” para Botërorit, pasi kishte debutuar me kombëtaren vetëm dy javë para aktivitetit.
PANORAMASPORT.AL
