Mauricio Pochettino ka thënë se ai është lideri te Chelsea, ndërsa edhe zbuloi mesazhin që e morri nga pronarët pas humbjes këtë vikend nga Wolverhampton.
Chelsea u mposht në “Stamford Bridge” nga Wolves me rezultat 4:2, humbje kjo e cila e thelloi edhe më shumë krizën e skuadrës së Pochettinos këtë sezon, raporton KosovaPress.
Kjo humbje spekulohej se e ka lëkundur tej mase pozitën e Pochettinos te Chelsea, por trajneri i “Bluve” zbuloi se ende e ka përkrahjen pronarëve të klubit.
“Morra një mesazh të mirë nga pronarët. Jemi të gjithë së bashku në këtë gjë. Kjo është më e rëndësishmja. Ata janë në kontakt me mua, çdo ditë. E ndjej përkrahjen e tyre. Ju thash lojtarëve në një takim të ri që ju besoj atyre më shumë se kurrë. Do të ju përkrah më shumë se kurrë”, tha Pochettino.
“Nuk jam një trajner normal, unë jam lideri këtu. Tifozët duhet të kenë durim. Ne duhet të gjejmë një mënyrë që të kemi sukses. Neve na duhet përkrahja, sigurisht, dhe ne po e kërkojmë përkrahjen për skuadrën, për lojtarët tanë. Merr kohë për ta ndërtuar një skuadër dhe ne duhet të kemi besim së bashku në projektin tonë. Është e vështirë por një projekt tejet emocionues”, shtoi më tej Pochettino.
