Portieri i Kombëtares së Shqipërisë, Etrit Berisha edhe sezonin e ri mund të paraqitet në Serie A të Italisë.
Bëhet e ditur se interesim për shërbimet e portierit 35-vjeçar ka shprehur skuadra e Cagliarit.
Thuhet se Cagliari i ka ofruar Berishës kontratë njëvjeçare me opsionin e vazhdimit edhe për një vit tjetër dhe palët janë në negociata për të arritur marrëveshjen eventuale.
Berisha te Kalari do të transferohej si lojtar i lirë pasi për momentin është pa klub për shkak se në fund të muajit qershor i skadoi kontrata me Empolin.
Ai ishte pjesë e Empolit prej verës së shkuar, ndërsa ka përvojë të madhe në futbollin italian pasi ka luajtur për ekipet si Torino, SPAL, Atalanta e Lazio.
Në total, Berisha ka 163 paraqitje në Serie A, ndërsa ka edhe 80 ndeshje për Kombëtaren e Shqipërisë.
