Përkundër ofertave nga Italia, Franca e Turqia, mbrojtësi i krahut të majtë, Mario Mitaj vendosi që karrierën ta vazhdoj në Lindjen e Mesme.
Futbollisti i Kombëtares së Shqipërisë, të martën është zyrtarizuar te skuadra nga Arabia Saudite, Al-Ittihad, pjesë e së cilës janë edhe yjet si Karim Benzema, Fabinho e N’Golo Kante.
Mitaj i është bashkuar ekipit saudit në formë huazimi nga Lokomotiva e Moskës, skuadër më të cilën ka kontratë deri në vitin 2027.
Për huazimin e tij njëvjeçar, Al-Ittihad ka paguar 1.2 milionë euro kurse vitin tjetër ka opsionin e blerjes së kartonit të Mitajt për 3.5 milionë euro tjera.
21-vjeçari prej vitit 2022 ishte pjesë e ekipit nga Moska, të cilit iu bashkua nga AEK-u i Athinës kurse me Kombëtaren e Shqipërisë ka regjistruar 16 paraqitje prejse debutoi në vitin 2021.
Mitaj pas paraqitjeve të mira në “Euro 2024” me Shqipërinë, kishte tërhequr interesimin e skuadrave të njohura nga Evropa si Juventus e Galatasaray.
