Fitorja 2-1 ndaj Brentfordit i dha fund një serie ndeshjesh pa fitore të Manchester United. Në fund të ndeshjes, Erik ten Hag vuri në pah karakterin e skuadrës, e cila në pjesën e parë u gjend në disavantazh.
“Kam parë një karakter të fortë të ekipit. Vendosmëria për të fituar pas një pengese shumë të madhe. Më pëlqeu shumë, ishte futboll shumë i mirë. Sigurisht që ne zemërohemi pasi pranojmë një gol”, ka shpjeguar Ten Hag, i cili kërkon të shmangë euforinë: “Ta shijojmë për 24 orë dhe pastaj vazhdojmë të mendojmë për ndeshjet e ardhshme”.
Paraqitjet e dobëta të Manchester United e lanë skuadrën, para fillimit të raundit të 8-të të Premier League-s, në vendin e 13-të, çka shënonte fillimin më të keq të “Djajve të Kuq” në 35 vjet.
Por sipas Erik ten Hag, kjo ecuri nuk ka ardhur për shkak të paraqitjeve të dobëta.
“E vetmja ndeshje e keqe që luajtëm ishte kundër Tottenhamit, në të cilën mbetëm me 10 lojtarë. Në të gjitha ndeshjet e tjera tregojmë karakter dhe shpirt luftarak. Të mos e mbivlerësojmë këtë rezultat, është vetëm një fitore. Duhet të fitojmë gjithmonë”, ka deklaruar holandezi.