Është padyshim favoriti absolut për të drejtuar “Djajtë e Kuq” të Manchester United.
Tekniku portugez, Ruben Amorim është vetëm një firmë larg kalimit te “gjigantët” e futbollit anglez, me këta të fundit që dëshirojnë të sigurojnë sa më shpejt shërbimet e 39-vjeçarit, në mënyrë që të përgatiten për sfidat e radhës.
Sipas raportimeve më të fundit të gazetarit të mirënjohur të merkatos, Fabrizio Romano, “Djajtë” janë të gatshëm të derdhin plot 10 milionë euro në arkat e Sporting, për të lënë të lirë teknikun portugez, shumë e cila është pranuar nga “Luanët” e Liga NOS.
Ndërkaq, kujtojmë se United shkarkoi holandezin Erik ten Hag, pas një nisje katastrofike të këtij sezoni, duke e pozicionuar skuadrën në vendin e 14-të, me vetëm 9 pikë, teksa në drejtimin e skuadrës, “tulipani” siguroi një EFL Cup dhe një FA Cup. /i.m /abcnews.al
