Pep Guardiola është i ndërgjegjshëm për momentin e vështirë të skuadrës së tij në këtë fazë të sezonit, por tha pas humbjes me Sportingun e Lisbonës se ai nuk do të dorëzohet.
“Nuk mund të thuash shumë kur humbet 4-1. Urime Sportingut të Lisbonës për ndeshjen. Ne patëm një pjesë të parë fantastike, por tani po vuajmë që të shënojmë. Ne krijojmë dhe pësojmë kundër. A është problem në mbrojtje? Ndoshta. Nuk e di. Kur luan shumë ndeshje ti nuk mund të aktivizosh të njëjtën katërshe mbrojtëse. Ne i kemi pasur këto probleme nga dita e parë, por situata është kjo që është.
Tani është një moment i vështirë sa i përket rezultateve, por unë dua që të jem këtu. Unë dëshiroj që të luftoj dhe të mos dorëzohem. Më pëlqen kjo sfidë si trajner. Kush dëshiron që të na ndjekë do të jetë këtu. Ky është futboll. Ndoshta ajo që kemi jetuar në të shkuarën është një përjashtim. Ndonjëherë edhe mund të humbasësh”.
PANORAMASPORT.AL
