FIFA do të organizojë në verën e vitit 2025 Botërorin e parë të Klubeve në histori me një format me 32 ekipe, që do u ngjajë më shumë turneve të kombëtareve. Aktiviteti i cili zhvillohet në SHBA, do të jetë unik në llojin e ti dhe përtej polemikave që ka prodhuar për shkak të mbingarkesës së ndeshjeve, të gjithë janë kureshtarë të shohin se si do të menaxhohet nga FIFA.
Kjo e fundit ka bërë të ditur edhe datën e hedhjes së shortit për fazën në grupe të turneut, teksa ka caktuar 5 dhjetorin si ditën kur do të mësohen ndarjet në 8 grupe të 32 skuadrave pjesëmarrëse.
Shorti do të zhvillohet në Majemi, qytetin që do të presë ndeshjen e hapjes, teksa do të fillojë në orën 13:00 lokale, 19:00 në Europë. Deri tani dihen 31 nga skuadrat pjesëmarrëse në turne, pasi e 32-ta do të dalë nga finalja e Kupës Libertadores mes Atletiko Mineiro dhe Botafogo.
SKUADRAT PJESËMARRËSE
AFC: Al Hilal, Uraua Red Dajmonds, Al Ain, Ulsan HD
CAF: Al Ahli, Uidad, Esperans de Tuniz, Memelodi Sandauns
CONCACAF: Monterrej, Siatëll Suanders, Leon, Paçuka
CONMEBOL: Palmeiras, Flamengo, Fluminense, Atletiko Mineiro ose Botafogo, River Plejt, Boka Zhuniors
OFC: Okland Siti
UEFA: Çelsi, Real Madrid, Mançester Siti, Bajern Mynih, PSG, Inter, Porto, Benfika, Borusia Dortmund, Juventus, Atletiko Madrid, Red Bull Salcburg
Me ftesë: Inter Majemi
PANORAMASPORT.AL
