Ish-mbrojtësi i Interit, Giusepe Bergomi, foli për mundësinë që Alessandro Del Piero të kandidojë për president të Federatës Italiane të Futbollit: “Alex e njoh mirë, sepse punojmë bashkë në ‘Sky’. E di si e sheh futbollin dhe sa i përgatitur është. Ka dëshirë të bëjë mirë dhe, po të ndodhte, do të ishte një zgjedhje e shkëlqyer. Në moshën 50-vjeçare është gati për një sfidë të tillë”.
Bergomi foli gjithashtu për karrierën e tij dhe përvojat në katër Kupat e Botës: “Zemra ime mbetet te Kupa e Botës 1982, ku në moshën 18-vjeçare u shpalla kampion i botës. Kishim një udhëheqës si Enzo Bearzot, i cili për mua ishte si një baba i dytë. Botërori 1990 është ende një plagë e hapur për mua, ajo gjysmëfinale ndaj Argjentinës dhe eliminimi më lëndojnë edhe sot. Sidoqoftë, u riktheva në “Francë 1998” pas pesë vitesh mungesë në kombëtare, dhe ajo ishte një hakmarrje personale”.
