Sulmuesi i Net Global Sivasspor, Rey Manaj, ka kërkuar falje nëpërmjet llogarisë së tij zyrtare në rrjetet sociale për ndërhyrjen e ashpër ndaj Barış Alper Yılmaz. Episodi negativ ndodhi në minutën e gjashtë shtesë, kur një ndërhyrje e gabuar nga pas e Manajt i shkaktoi një dëmtim serioz futbollistit të Gallatasarait, që u largua nga fusha me barelë.
Në deklaratën e tij, Manaj u shpreh:
“Sot jam shumë i trishtuar për një situatë që nuk doja të përjetoja në karrierën time profesionale. Dua të siguroj me gjithë sinqeritetin tim si Barış Alper Yılmazin ashtu edhe opinionin publik të futbollit se nuk pata qëllim të shkaktoj faull apo lëndim.
Kjo ndodhi në momentet kur, nga adrenalina dhe emocionet e rezultatit të ndeshjes, po përpiqesha të kontribuoja për ekipin tim. Me gjithë zemër i uroj Barış Alper Yılmazit shërim të shpejtë dhe shpresoj ta shoh sa më shpejt sërish mes nesh. Kërkoj falje për këtë situatë.”
Mjeku i ekipit të Galatasarayit, Yener İnce, ka dhënë deklarata lidhur me gjendjen shëndetësore të Barış Alper Yılmaz:
“Nuk ka dyshime për frakturë në këmbën e Barış Alper Yılmaz. Për shkak të ndërhyrjes së ashpër në tendinën e Akilit, ka një problem në gjurin e tij. Gjendja e tij do të qartësohet pas ekzaminimit me rezonancë magnetike (MR).”
