Interi ka fituar 2-1 në transfertë ndaj Bajern Mynih ndeshjen e parë çerekfinale të Ligës së Kampioneve. Por në nivele të tilla, gjithçka mund të ndodhë. Ndaj zikaltrit po përgatiten për çdo eventualitet të mundshëm, përfshirë edhe penalltitë.
Në konferencën e sotme për mediat, Inzagi u pyet nëse ekipi i tij i kishte praktikuar së fundmi dhe trajneri nuk ngurroi të pohonte, duke shpjeguar arsyen. “Gjithmonë, kur është një ndeshje me eliminim direkt. Dhe me 5 zëvendësimet që mund të kryhen, ka edhe më shumë kujdes në krahasim me ata që nisin ndeshjen nga minuta e parë”, shpjegoi Inzagi, duke bërë të qartë se në këto gjuajtje përfshihej e gjithë skuadra.
Trajneri ka qenë i kujdesshëm dhe ka bërë thirrje që skuadra të jetë e vëmendshme po ashtu. “Nuk duhet të mendojmë për rezultatin, por te paraqitja që kemi bërë. Nuk duhet të shohësh precedentët, të cilët në historinë e Interit me Bajernin në “San Siro” nuk kanë qenë gjithmonë pozitivë. Djemtë janë pozitivë, skuadra e di që luajmë kundër një kundërshtari të madh. E respektojmë, por me vëmendjen e duhur mund të bëjmë një ndeshje të madhe”, tha ndër të tjera Inzagi.
PANORAMASPORT.AL
