Real Madrid po vazhdon procesin e rindërtimit në repartin e mbrojtjes për sezonin e ardhshëm, dhe një nga emrat që ka dalë në pah me forcë në agjendën e “Los Blancos” është Dani Vivian.
Qendërmbrojtësi i Athletic Club de Bilbao ka tërhequr vëmendjen e stafit teknik madrilen, i cili e sheh atë si një opsion të besueshëm me potencial për të përforcuar zemrën e mbrojtjes.
Skuadra e bardhë po kalon një fazë tranzicioni në mbrojtje.
Me largimin e pritshëm të Jesús Vallejo në fund të sezonit dhe pasiguritë që lidhen me vazhdimësinë e David Alaba-s (i penguar nga dëmtimet dhe forma e paqëndrueshme), drejtuesit sportivë ndihen të detyruar të kërkojnë zgjidhje afatmesme.
Ndërkohë, paraqitjet e shkëlqyera të Antonio Rüdiger sugjerojnë se ai do të mbetet një pjesë kyçe e ekipit, ndoshta deri në vitin 2028.
Në këtë kontekst, Dani Vivian, i cili ka kontratë me Athletic Bilbaon deri në vitin 2032 dhe një vlerë të vlerësuar në treg prej 40 milionë eurosh, del në skenë si një alternativë vendase, e re dhe tashmë e konsoliduar në La Liga.
Soliditeti i tij në mbrojtje, qëndrueshmëria me klubin bask dhe thirrjet e rregullta në kombëtaren spanjolle e bëjnë një kandidat interesant për të ardhmen e Real Madridit.
Sipas raportimeve nga DefensaCentral, skautët e Real Madridit do të përfitojnë nga vizita e Athletic Bilbaos në “Santiago Bernabéu” për të vëzhguar nga afër performancën e lojtarëve.
Fillimisht vëmendja ishte e përqendruar te Nico Williams, por mungesa e tij për shkak dëmtimi e ka zhvendosur fokusin te Vivian, i cili mund të fitojë një vend të rëndësishëm në listën e përforcimeve për merkaton e verës.
Edhe pse jo zgjedhja më e bujshme, në Valdebebas vlerësohet lart besueshmëria e tij,përvoja në nivel elitar dhe aftësia për të evoluar më tej në një ambient konkurrues si ai i Real Madridit.
