Real Madrid mundi Athletic Bilbao falë një goli të vonshëm nga Fede Valverde me rezultat minimal 1-0.
Por fokusi pas ndeshjes ishte te gjyqtari. Televizioni i madrilenëve, Real Madrid TV ngriti pikëpyetje për dy vendime të rëndësishme: offside që anuloi golin e Vinicius dhe penalltia që nuk u dha për një faull ndaj Jude Bellingham.
E pas ndeshjes në Real Madrid lëshuan akuza të forta, duke thënë se gjyqtarët u munduan ta largonin Realin nga lufta për titullin.
“Ata u përpoqën ta largonin Real Madridin nga gara për titull, por ne jemi ende duke luftuar”.
Ata kritikuan gjithashtu vendimin e VAR për të anuluar golin e Vinicius, duke shtuar: “Ku është topi në gjysmëautomatik? Nuk duket. Thjesht duhet ta besojmë?”.
Ata ishin gjithashtu të mërzitur me mungesën e ndërhyrjes së VAR në incidentin e Bellingham. “Me këtë futboll të ri, Madridi merr vetëm penallti kundër tyre. Nëse ai i Camavinga ishte një penallti në Pamplona, pse jo kjo?” pyetën ata. “Martinez Munuera tashmë i kushtoi Madridit një ligë vite më parë. Ai pothuajse e bëri atë përsëri”.
Pas publikimit të audios së VAR-it, Real Madrid TV ka reaguar ashpër: “Është një shaka. Ata qeshin përballë tifozëve. Ky grup nuk është i aftë për të bërë punën e tij. Prandaj FIFA nuk thirri asnjë spanjoll për Kupën e Botës për Klube”.
