Oklahoma City Thunder ka arritur një fitore të rëndësishme ndaj Indiana Pacers me rezultatin 123:107, duke barazuar serinë finale të NBA-së në 1:1.
Pas humbjes në ndeshjen hapëse në shtëpi, Thunder nuk kishin hapësirë për gabime dhe reaguan fuqishëm në ndeshjen e dytë.
Protagonist i padiskutueshëm ishte Shai Gilgeous-Alexander, i cili shkëlqeu me 34 pikë dhe kaloi pragun e 3,000 pikëve sezonalë, duke udhëhequr ekipin drejt fitores.
Një seri dominuese prej 19:2 në çerekun e dytë i dha fund rezistencës së Pacers dhe vendosi rrjedhën e lojës në favor të vendasve.
Kontribut të madh nga stoli dha Alex Caruso me 20 pikë, ndërsa edhe Jalen Williams (19), Aaron Wiggins (18) dhe Chet Holmgren (15) treguan gjerësi dhe forcë në sulm.
Indiana pati vështirësi përballë mbrojtjes agresive të Oklahomës dhe nuk arriti të imponojë ritëm. Tyrese Haliburton ishte më i miri për mysafirët me vetëm 17 pikë, por që nuk ishin të mjaftueshme për fitore.
Ndeshja e tretë e serisë zhvillohet të mërkurën në Indianapolis, duke shënuar herën e parë pas 25 vitesh që ky qytet mirëpret finalet e NBA-së.
