Real Madrid është lidhur me disa mesfushorë gjatë afatit kalimtar të verës, por deri më tani nuk ka ndërmarrë asnjë hap konkret. Megjithatë, ekziston një bindje në rrethin e brendshëm të klubit se, nëse do të kishin mundësi, Enzo Fernandez do të ishte objektivi kryesor.
Mesfushori argjentinas ishte në listën e dëshirave të “Los Blancos” që kur luante për River Plate, dhe klubi spanjoll e kishte sërish në radar para se Chelsea të paguante 121 milionë euro për ta transferuar pas disa muajve mbresëlënës te Benfica.
Edhe pse forma e tij në Premier League ka qenë e luhatshme, në Madrid vazhdojnë ta shohin Fernandezin si një nga mesfushorët e rrallë që mund të kontrollojë lojën nga qendra e fushës.
Sipas gazetarit Simon Philips në platformën e tij Talk Chelsea, Real Madrid po vazhdon të dërgojë sinjale drejt Chelseat për interesimin ndaj Fernandezit. Megjithatë, burimi i tij shpjegon se kontakti në klubin londinez përgjigjet vetëm me emoji që tregojnë çanta me para, duke lënë të kuptohet se çmimi është shumë i lartë.
Chelsea nuk ka asnjë plan për të shitur 24-vjeçarin, dhe nuk do të shqyrtonte asnjë ofertë përveç nëse Real Madrid do të bënte një propozim të jashtëzakonshëm financiar. Rekordi aktual i transferimeve te “Los Blancos” është Jude Bellingham, me marrëveshjen që mund të arrijë deri në 135 milionë euro nëse përmbushen të gjitha bonuset, por për Enzo Fernandezin, Real Madrid do të duhej të tejkalonte edhe këtë shifër për ta bindur Chelsean të ndryshojë qëndrim.
