E ardhmja e Armando Brojës raportohet se mund të jetë në Amsterdam, pasi Chelsea po shqyrton mundësinë që ta përfshijë sulmuesin shqiptar në marrëveshjen për transferimin e Jorrel Hato-s nga Ajax-i.
Sipas medieve britanike 19-vjeçari Hato, që prej javësh ndodhet në ‘radarët’ e Arsenalit, është vlerësuar nga Ajax-i 40 milionë euro, shifër që londinezët e “Emirates” kanë hezituar ta paguajnë.
Kjo ka krijuar hapësirë për Chelsea-n, që synon të përfitojë nga situata duke futur kartonin e Brojës në bisedime, për të ulur çmimin.
Broja, i cili mbetet në pronësi të ‘Bluve’ të Londrës, shihet si një opsion interesant për Ajax-in, që më herët është informuar për situatën e tij kontraktuale.
Chelsea është gati të sakrifikojë Brojën për të mbyllur me sukses operacionin për mbrojtësin e talentuar.
