Selektori i Sllovenisë, Matjazh Kek nuk e ka përjashtuar mundësinë që të kërkojë ndihmë nga Primozh Gliha para duelit me Kosovën.
Gliha ka qenë selektor i përkohshëm i Kosovës para ardhjes së Franco Fodas, ndërsa Kek ka shtuar se ai e njeh mirë ekipin e “Dardanëve”.
“Gliha e njeh mirë atë mjedis dhe nuk do të thotë se nuk do të flas me të pasi çdo informacion mund të jetë i dobishëm, ndonëse e kemi parasysh se çfarë na pret në Kosovë”, ka thënë Kek.
Kek ka pranuar se Kosova mbetet një kundërshtar i fortë, duke shtuar se fitorja kundër Suedisë nuk ishte e rastësishme.
Ai ka thënë se vlerëson lartë Kosovën, kundërshtarin me të cilin do të përballet të premten mbrëma në Prishtinë.
Pas dy ndeshjeve të luajtura në kuadër të Grupit B kualifikues, Sllovenia ka vetëm një pikë, dy më pak se Kosova.
