Tashmë mungon vetëm zyrtarizimi i plotë për zhvillimin e ndeshjes Milan–Como në Perth të Australisë, e planifikuar për muajin shkurt 2026. Pas miratimit përfundimtar të dhënë nga UEFA, pritet vetëm komunikimi formal nga FIFA, i cili shihet si një formalitet, pasi pengesa kryesore tashmë është kapërcyer.
Sipas ‘La Repubblica’, ky duel “australian” do të ketë një vlerë totale prej 12 milionë eurosh, shifër që përfshin edhe mbulimin e plotë të shpenzimeve të udhëtimit dhe akomodimit. Fitimi do të ndahet jo vetëm mes dy klubeve pjesëmarrëse, por edhe mes të gjitha skuadrave të tjera të Serie A-së.
Milani do të përfitojë pjesën më të madhe të të ardhurave, si kompensim për mungesën e të ardhurave nga biletat në Itali, ndërsa Como do të marrë një pjesë të konsiderueshme si skuadra e dytë pjesëmarrëse. Pjesa e mbetur e shumës do të shpërndahet proporcionalisht mes ekipeve të tjera të kampionatit italian.
Ndeshja do të zhvillohet mes datave 7 dhe 8 shkurt 2026, një periudhë kur në Itali do të jetë dimër, ndërsa në Australi verë. Për këtë arsye, stafet organizative të të dy klubeve kanë nisur përgatitjet që tani, për t’u përshtatur me klimën dhe ndryshimin e madh të orës lokale.
Të gjithë abonentët e Milanit do të rimbursohen për këtë ndeshje, edhe pse atyre që dëshirojnë ta ndjekin duelin në Perth do t’u duhet të blejnë një biletë të re në Australi.
Ky do të jetë udhëtimi i tretë i Milanit në Perth brenda dy viteve të fundit: në maj 2024 kuqezinjtë u përballën me Romën (5-2 për verdhekuqtë), më pas në korrik 2025 fituan 9-0 ndaj Perth Glory, ndërsa tani do të rikthehen për përballjen me Como-n, një ngjarje që pritet të ketë impakt të madh mediatik dhe ekonomik për Serie A-në.
