Në podcast-in e vllezërve Kroos, “Einfach mal Luppen”, u diskutua gjatë për ekipin e Barcelonës pas humbjeve të pësuara në dy takimet e fundit.
Sipas Toni Kroos skuadra spanjolle rrezikon shumë me stilin e lojës që ka. “Barcelona luan shumë bukur futboll, bën futbollin më të bukur në Europë, por në të njëjtën kohë them se rrezikojnë shumë. Duke mbajtur lojtarët aq shumë larg portës kanë krijuar një stil loje mjaft të rrezikshëm. Ky kthehet në një problem edhe më i madh pas minutës së 75’, kur të gjithë lodhen. Kjo nuk është normale pasi kështu ekipi ekspozohet edhe më shumë pasi e kanë të vështirë që të mbyllin hapësirat boshe”, shpjegon Kroos.
Ish-mesfushori i Real-it tregon se skuadra e Flick ka një bosht prej tre lojtarësh, të cilët nëse nuk janë në ditën e tyre më të mirë bëjnë që Barcelona të kthehet në një ekip normal. “Pedri, Yamal dhe Raphinha janë tre futbollistë, të cilët nëse nuk janë në ditën e tyre më të mirë nuk mund të shmangin humbjen e ekipit, i cili kthehet në një formacion normal”, tregon Kroos.
