Pas suksesit si influencere, modele, sipërmarrëse dhe protagoniste e serisë në Netflix, Georgina Rodriguez nis një aventurë të re: atë në YouTube. Partnerja e Cristiano Ronaldos ka prezantuar kanalin e saj “Georgina Gio”, duke u futur kështu në universin e krijuesve dixhitalë me synimin për të ndërtuar një markë personale edhe më të fuqishme.
Në këtë kanal, 31-vjeçarja do të ndajë video që prekin botën e modës, biznesit, luksit dhe jetës familjare, pa munguar sigurisht edhe momentet përkrah CR7.
Për nisjen e projektit, Georgina publikoi tri video të para: një prezantim për ndjekësit, një tjetër me Cristiano Ronaldon në rolin e bashkëprotagonistit, dhe një video pas kuintave nga përgatitjet për Festivalin e Venecias. Vetëm në 24 orë, kanali i saj arriti mbi 24 mijë abonentë: një nisje mbresëlënëse që tregon ndikimin e saj global.
Krahas saj, Cristiano Ronaldo mbetet një gjigant në YouTube: kanali “UR Cristiano”, i hapur në vitin 2024, arriti 1 milion ndjekës për vetëm 90 minuta dhe numëron sot më shumë se 76 milion abonentë, duke u renditur ndër më të mëdhenjtë në botë. Me Georginën që tashmë ka hyrë në të njëjtën fushë, çifti më i famshëm i futbollit pritet të shkëlqejë edhe në arenën dixhitale, me një “duel” të butë, të mbushur me dashuri, luks dhe përmbajtje që premton të bëhet virale.
