Barcelona e drejtuar nga Hansi Flick arriti një fitore të rëndësishme 4-2 ndaj Celta Vigo-s në “Balaídos”, duke i dhënë fund një serie prej katër ndeshjesh pa fitore në transfertë dhe duke u shkaktuar galicianëve humbjen e parë pas pesë fitoreve radhazi.
Ndeshja nisi me ritëm të lartë. Balde shpëtoi Barcelonën me një ndërhyrje në vijën e portës, ndërsa pak më pas katalanasit fituan penallti pas prekjes me dorë të Alonso-s mbi goditjen e Fermín López. Robert Lewandowski ishte i saktë nga pika e bardhë. Celta reagoi shpejt dhe barazoi me Carreira, pas një aksioni të shpejtë kundërsulmi.
Në fund të pjesës së parë, Rashford asistoi mrekullisht për Lewandowskin, i cili shënoi golin e dytë për Barcelonën, por gëzimi zgjati pak: Borja Iglesias barazoi me një goditje të fuqishme në vijën e 16 metrave. Megjithatë, në minutat shtesë, talenti Lamine Yamal shënoi me të djathtën për 3-2, duke rikthyer epërsinë e katalanasve në pushim.
Në pjesën e dytë, Barcelona dominoi plotësisht lojën. Celta u detyrua të mbrohej me gjithë skuadrën, ndërsa miqtë qarkullonin topin me qetësi dhe durim. Në minutat e fundit, Rashford dërgoi një top perfekt nga goditja e këndit dhe Lewandowski realizoi me kokë golin e tretë personal, duke kompletuar ‘tripletën’.
Edhe pse në fund Frenkie de Jong u ndëshkua me karton të kuq, kjo nuk e zbehu fitoren e merituar të Barcelonës, e cila përfitoi nga barazimi i Real Madridit me Rayo Vallecanon dhe tani ndodhet vetëm tri pikë prapa “Los Blancos”. Celta, pavarësisht formës së mirë të javëve të fundit, mbetet në vendin e 13-të të La Ligës.
