Më 19 dhjetor, Jake Paul do të përballet me Anthony Joshua në një duel profesionist tetëraundësh në peshat e rënda, që do të transmetohet drejtpërdrejt globalisht në Netflix. Ky është testi më i madh në karrierën e Paul, i cili prej vitesh ka kërkuar të sfidojë një nga goditësit më të frikshëm të boksit modern. Joshua, ish-kampion i dyfishtë i unifikuar i botës dhe medalist i artë olimpik, përfaqëson pikërisht atë lloj kundërshtari që Paul pretendonte se e donte.
Jake Paul ka kaluar nga figura kontroverse e internetit në një konkurrent serioz në ring gjatë pesë viteve të fundit, duke mposhtur emra si Tyron Woodley, Anderson Silva dhe Nate Diaz. Fitorja e tij në peshat e rënda ndaj Mike Tyson në vitin 2024 thyen rekordet e shikueshmërisë, me mbi 108 milionë ndjekës. Në qershor 2025, ai mundi ish–kampionin Julio César Chávez Jr., gjë që e futi në renditjen e WBA-së për peshat ‘cruiser’.
Paul ka fituar edhe çmime prestigjioze si ‘ESPN Knockout of the Year’ dhe është përfshirë në listën e “50 figurave më me ndikim në sport” të ‘Sports Illustrated’. Përballja me Joshua shihet si hapi vendimtar për të provuar se meriton një mundësi për titull bote.
Nga ana tjetër, Anthony Joshua ka ndërtuar një nga CV-të më të fuqishme të peshës së rëndë të epokës së fundit. Ai u ngjit në majë pas 2012-s, duke unifikuar titujt WBO, WBA dhe IBF, ndërsa dueli epik ndaj Wladimir Klitschko-s në Wembley mbetet një nga ndeshjet më të mëdha të shekullit. Pavarësisht disfatave, ai vazhdoi të kërkonte sfidat e mëdha, duke fituar ndaj emrave si Parker, Povetkin, Pulev, Wallin dhe Ngannou. Joshua synon të bëhet kampion i botës për herë të tretë dhe përballja me Paul është pjesë e këtij misioni.
Sfida Paul–Joshua është një përplasje mes spektaklit modern të boksit dhe elitës tradicionale të peshës së rëndë, një duel që pritet të thyejë rekorde dhe të tërheqë vëmendjen botërore. Ndeshja do të shfaqet ekskluzivisht në Netflix dhe është e përfshirë në çdo plan abonimi.
