Kombëtarja e Shqipërisë kaloi edicionin më të suksesshëm në kualifikueset e Botërorit.
Djemtë e drejtuar nga Silvinjo u renditën në vendin e dytë pas Anglisë, duke lënë prapa Serbinë.
Mario Mitaj ishte lojtari më i vlerësuar sipas statistikave nga “Sofascore”, pasi me notën mesatare 7.62, u bë pjesë e formacionit të sezonit.
Jo vetëm Mitaj, është edhe një tjetër futbollist i Kombëtares së Shqipërisë ka spikatur.
Bëhet fjalë për portierin Thomas Strakosha.
Gardiani i Kombëtares kuqezi është i dyti nga portierët e kualifikueseve në Europë bashkë me Unai Simon, sa i përket ndeshjeve me portën e paprekur.
Strakosha qëndroi në pesë ndeshje pa pësuar gol, ndërsa u mposht në dy ndeshje nga Anglia dhe një tjetër nga Letonia.
Vetëm Pikford me shtatë, ndodhet në krye të listës, teksa Livakoviç i Kroacisë dhe Kobel me Zvicrën ndjekin me nga katër ndeshje.
