Trajneri i Turqisë, Vincenzo Montella, ka filluar të marrë që tani masat për sfidat e ply-off-it të Botërorit 2026, që zhvillohen në muajin mars. Ai ka bërë me dije madje se i ka kërkuar federatës që të ndalojë kampionatin.
“Kam tre lojtarë në Serinë A, i kam kërkuar federatës të ndalë kampionatin të dielën e fundit. Nëse të vijnë lojtarët të hënën, nuk mund të bësh stërvitje të vërtetë deri të mërkurën, ndërsa të enjten është prag ndeshja. Të kesh dy ditë më shumë në dispozicion bën diferencën. Edhe Gattuso do të ishte i kënaqur”, ka thënë Montella.
Për shortin e gjysmëfinaleve, që e përball Turqinë me Rumaninë, trajneri italian u shpreh: “Është një skuadër e re, që mori pjesë në Europian. Lucescu është një maestro për të gjithë ne. E vërteta është se për të shkuar në Botëror, duhet të japësh maksimumin ndaj çdokujt”.
Në fund, për shortin e Italisë, Montella theksoi: “Italia favorite kundër Irlandës së Veriut? Duhet të japësh gjithçka, pastaj në finale do të gjejë Uellsin ose Bosnjën. Me Uellsin jam përballur disa herë vitet e fundit, në fushën e vet transformohet, është një ndeshje shumë e ashpër”.
Nëse kualifikohet për në finale, Turqia mund të përballet me Kosovën në “Fadil Vokrri”, gjithmonë nëse “Dardanët” kalojnë Sllovakinë.
