Lamine Yamal pati një ndeshje të zbehtë në përballjen e Barcelonës me Chelsea-n, kryesisht për shkak të mbulimit të rreptë që Marc Cucurella i bëri gjatë gjithë takimit. Futbollisti i Chelsea-t e neutralizoi plotësisht talentin e Barcelonës, duke e lënë jashtë lojës për pjesën më të madhe të ndeshjes.
Trajneri i Barcelonës, Hansi Flick, reagoi pas duelit dhe i dërgoi një mesazh të drejtpërdrejtë të riut katalanas.
“Cucurella është një nga mbrojtësit e majtë më të mirë në botë; është një lojtar shumë i mirë,” tha Flick. “Por, për mua, tani është radha e Lamine-it të ngrihet dhe të tregojë se ndeshja me Chelsea-n duhet harruar.”
Trajneri gjerman e bëri të qartë se ky është momenti ku Yamal duhet të tregojë personalitet dhe cilësitë që e bëjnë një nga talentet më premtues në botë.
“Ky është momenti kur ai duhet të tregojë sa i mirë është,” nënvizoi Flick.
Lamine Yamal do të ketë mundësinë për të reaguar këtë fundjavë në ndeshjen kundër Deportivo Alavés, në ‘Camp Nou’. Një paraqitje e fortë përballë tifozëve të tij do të ishte mënyra ideale për të rikthyer besimin dhe për t’u përgjigjur mesazhit të Flickut. Tani gjithçka është në këmbët e tij.
