Komisioni i Koordinimit për Lojërat Mesdhetare ‘Prishtina 2030’ sot do t’i paraqesë familjes së ICMG-së progresin e përgatitjeve dhe planin master të Lojërave Mesdhetare ‘Prishtina 2030’, në kuadër të Asamblesë së Jashtëzakonshme që mbahet në Portimão të Portugalisë.
Pas disa takimeve me udhëheqjen e Komitetit Olimpik të Kosovës, përfaqësuesit e ICMG-së kanë përgatitur një raport gjithëpërfshirës mbi zhvillimet e deritanishme, dinamiken e punëve dhe hapat që priten të ndërmerren në muajt e ardhshëm.
Ky prezantim konsiderohet një moment kyç për OCMG Prishtina 2030, pasi për herë të parë para delegacioneve të të gjitha vendeve mesdhetare do të paraqitet qartë vizioni, infrastruktura e planifikuar dhe objektivat strategjike që synojnë të garantojnë organizimin e një edicioni historik të Lojërave.
Diskutimet e sotme pritet të përcaktojnë ritmin e mëtejmë të përgatitjeve dhe të forcojnë besimin institucional se Prishtina do të jetë gati të presë garën më të madhe shumësportëshe në rajon.
/KosovaPress
